CARIBBEAN KIDS NEWS TA SIGUI!
Willemstad – Caribbean Kids News, e notisiero pa hóben ku últimamente tabata pasa tur dia na televishonnan lokal ku dos edishon fresku pa siman ta sigui. Den e aña ku ta tras di lomba e fundashon a traha duru pa buska finansiamentu, tantu lokal komo internashonal, pa kubri e presupuesto di e aña aki. Awor nos por anunsiá ku nos a logra. Lokual ta nifiká ku awor tin sufisiente sèn pa kontinuá ku e programa. For di mei próksimo e programa lo sigui ku notisia prinsipalmente for di Kòrsou. Anteriormente nos tabata trese notisia for di tur isla di reino hulandes, pero den e fase nobo nos ta bai focus mas tantu riba notisia di Kòrsou i notisia international.
Caribbean Kids News ta un inisiativa di FreeVoice. Un organisashon ku ta lanta notisiero pa hóben rònt mundu i ku éksito. Pa hasi esaki pa e islanan di Antia tambe, FreeVoice a traha huntu ku entre otro gobièrnu Hulandes riba e finansiamentu na moda ku proyekto por a kuminsá. E finansiamentu aki a tabata pa un periodo di un aña i mei. E palabrashon tabata ku despues di e periodo aki e komunidat di Antia i Aruba mes lo a sòru pa finansiamentu di e programa aki. Lamentablemente esei no a logra, ku tur e konsekuenshanan ku e ta trese kuné. Sigun e presidente di Stichting Youth into Media, señora Gyselle Petronia ta di lamentá ku apesar di tur e reakshonnan positivo pa ku e programa ta haña, tòg ta resultá ku no tin sufisiente sosten den e komunidat pa por karga e inisiativa positivo aki finansieramente.
Entre tantu a lansa notisiero pa hóben den shete pais lokual ta hopi popular. Ta wòrdu kalkulá ku esakinan ta duna 20 mion mucha entre 8 pa 14 aña chèns pa duna nan opinion na televishon i riba Internet. Eksperensha ta mustra ku notisieronan hubenil ta wòrdu apresiá dor di nan balor agregá edukativo. Echo i opinionnan riba tur klase di tema kompliká ta wòrdu trese na un manera simpel pa e hubentut. P’esei mes e meta di Caribbean Kids News tabata pa e hóbennan di Aruba i e islanan di Antia desaroyá un konosementu i partisipashon den aktualidat.
Caribbean Kids News tin su mes studio i ta ofresé trabou na un promedio di 5 persona. Entre otro periodistanan, asistentenan di kantor i otro téknikonan. Den e aña i mei ku ta tras di lomba CKN a produsí un total di 135 edishon. E programa ta pasa na Kòrsou, Sint Maarten, Bonaire i Aruba.
(27 April 2011).
