VISHON
Kolumna di Karel Frielink
Un reklamo ku bo ta tende hopi: gobièrnu no tin vishon. Bon mirá, kiko ta vishon?
Si ta trata di un pais, den nos kaso Pais Kòrsou, un vishon ta, pues, un imágen futuro ku ta duna inspirashon. Un soño alkansabel. Ideanan ku ta indiká kon Pais Kòrsou por i mester desaroyá den e siguiente 10 pa 20 aña. Ideanan ku nos ta kompartí kolektivamente. Den un palabra, un vishon di futuro. I nos ta sinti falta di esaki.
Na 10-10-10 pais Kòrsou a nase. Un pais ku un gran futuro su dilanti. Pero tambe un pais ku un pasado, un herensia. I e herensia ei no ta konsistí solamente di un kultura atministrativo-polítiko ku ta karakterisá su mes pa interes privá i nepotismo.
Tin míles di persona na Kòrsou ku tin un bibienda defisiente. Tin ku apénas tin un entrada òf no tin entrada mes. No tin sèn pa duna yunan kuminda pa bai skol kuné. Nan ta adikto na droga. Nos ta lesa den korant tokante kiebro, atrako, krímen organisá i korupshon ku ta afektá komunidat profundamente. Tambe un desempleo bou di hubentut di mas o ménos 37%.
Pero unda e plannan, ideanan a keda pa atendé e problemanan akí i otronan di manera fuerte i struktural? Ministernan di enseñansa ta bin i bai. Un minister di asuntunan sosial ku ta pensa na eskala chikí i riba término kòrtiku. Nos ta mira e problemanan, pero nos no ta solushoná nan. “The only thing worse than being blind is having sight but no vision ” (Helen Keller).
Ora bo pensa riba Aruba, bo ta pensa riba e koló bèrdè. Kon ku bo pensa riba Aruba i spesialmente riba finansa públiko, e pais ei a pone su mes riba mapa ku un vishon kargá pa Mike Eman. Un vishon ku tin komo karakterístika importante ku en prinsipio tin ku enbolbí tur habitante di Aruba i ku finalmente ta bin mas prosperidat i bienestar pa pueblo den su totalidat.
Pero unda nos ke ta ku Kòrsou aki 10, 25 i 50 aña? Ki vishon nos tin pa ku nos futuro? Tur kos mester ta sigur otro. Nos no por sigui biba manera nos ta biba awor. Ku falta di vishon. Miskiña. Keda ku nos kabes den santu. Keda bira bira den frustrashonnan di nos historia. Demasiado nashonalista. Demasiado hende ku ta okupá ku nan propio interes.
Interes di pueblo tin ku bini bèk na promé lugá. Anto mi ta referí na pueblo kompleto i no solamente na e parti ku polítikonan ta gusta apelá na dje. Nos tin ku pensa den grandi. Tin ku uni tur forsa. Tin nesesidat di un aserkamentu integral: ekonomia, situashon sosial, medioambiente, kultura i asina nos por sigui menshoná, tur ta mas relashoná ku otro ku nos ta pensa.
I tin ku kuminsá lihé ku esaki. Pues nos tin na Kòrsou tantu prosperidat enorme komo pobresa penoso. E peligernan di tur esaki ta: instabilidat ku ta oumentá, un sosiedat ku no ta funshoná i un oumento di kontradikshon polítiko i sosial. Den un ambiente manera esaki polítiko i otro figuranan marginá ta haña oportunidat pa krese.
Despues di vishon ta sigui aserkamentu. Ta masha bunita si tin plan, pero tin ku ehekutá nan. Esaki ta trese e siguiente problema. Loke ta falta ta unanimidat, solidaridat i formashon di un tim. Kada ken ta okupá ku su propio interes i derechinan atkirí, miéntras nan ta pèrdè e totalidat for di bista.
Mira tur e diskushon tokante e lugá pa konstruí e hospital nobo. I e diskushon aktual tokante monumentonan históriko ku a òf tin ku basha abou. Pensa riba e sindikatonan ku no ta duna sufisiente aporte konstruktivo tokante un aparato di empleado públiko ku ta funshoná di forma efektivo. Pensa riba un bon idea manera Airport City ku a kue hinka den lachi. Anto esaki no ta e úniko plan ku no a realisá pa motibunan ku no ta al kaso. Ta masha bon mes si ekspertonan di China ta buska informashon tokante nos refineria, pero pakiko no ta duna atenshon na alternativanan manera Green Town?
Último tempu ta papia hopi di e historia eksitoso ku yama Singapore. Pero ta un diktador a dirigí Singapore pa hopi dékada. No ta esei ta loke nos lo ke. Pero sí tin nesesidat di liderato. Liderato grandi. Un hòmber òf un muhé ku huntu ku su tim ta traha pa nos logra konstruí di forma uní, un futuro bunita i duradero pa e Pais Kòrsou i su pueblo. Pero esaki ta eksihí sí ku polítikonan ku ta tin di bisa den e último añanan disparsé for di e esena polítiko. Un generashon nobo i fresku i di integridat intachabel mester tuma esaki den nan man.
E futuro lider ku ta krea inspirashon, ku ta bai pa reto i ta dinámiko, bo ke mèldu bo mes? Bo por konta for di awor ku mi sosten!
Kolumna di Karel Frielink den ‘Ki siman!’ na Paradise FM (23 di mei 2015).
.
